الصدر ضايق وانت ضيّقت صدري

وانا معك من غير وجهه.. وتحديد

يا كثر ما تجرحني.. ويزيد صبري

كنّك تقول أزيد.. واقول لك زيد!

تقول يا عمري.. واقول انت عمري

كنّي وراك أسمع وش تقول.. واعيد

احيان اسولف فيك.. واحيان اهذري

كنّي أسوِّي للأحاسيس تجديد

ما راح تلقا (صدق واحساس) كثري

وان كان ما انت مصدّق.. أعطيك تأكيد

غنّيت لك.. (ياللي على البال تطري)

وانا من يدين الصبر للمواعيد

ورجعت اغنّي فيك.. (ما عاد بدري)

لو وقّفت دونك (سلوم وتقاليد)

أشفق على صوتك مع الليل وأسري

حتى وانا جالس بوسط الأجاويد

يا صاحبي.. غزيتني غزو فكري

واصبحت تحكمني.. وانا مقدر أحيد

مو بس أحبك.. إلاَّ سلمتك أمري

ناقص تجي.. وتحط بيديني القيد

صرت أتمنى.. بس يعجبك شعري

حتى لو انه ما عجب.. زيد وعبيد

من وين اببدأ فيك.. والوصف يغري

نور الليالي.. واحتفالية العيد

تلعب دلع وانت الدلع فيك فطري

اي والله (العب فيهم).. وكيدهم كيد

عندك خبر.. صوتك رومنسي وسحري

واحساسك اصلي.. ما معك شي تقليد

وزينك على بعضه (مميّز وحصري)

إعجاز.. بس إعجاز من غير تعقيد

شعرك.. وإلا عيونك.. أو عاد تدري

ما ودي أفتِّح عيون المقاريد

تقبّل إحساسي.. وحبي.. وشكري

حتى لو إنِّي ما قطفت العناقيد

وسلّم على قلبك.. ترى الحب عذري

ودوبك على قلبي.. فدتك التناهيد

إمَّا تشوف لوضعنا حل جذري

وإلاّ بلاش نحب.. ونعيد.. ونزيد

- الشاعر/ عطا الله فرحان