يا هاجسي هات النوادر لا تجيب إلا ذهب

هات الكلام اللي يشرفني ويرضي السامعين

أنا هواي ليا حضر زين الكلام المنتخب

اللي يعطر بالخزامى والنفل والياسمين

واليوم يوم النار شبوها وزادوها حطب

سود النوايا حقدهم قد بان من طول السنين

والحوثي اللي في عباة مسيلمة وأبو لهب

لا يحسب أنا عنه نكار الجمايل غافلين

غرّوه عدوان الشريعة وانّكب ثم انّكب

واسياده كبار العمايم جت عليهم نكبتين

عيوا يطيعون النصايح من نصوحٍ ما كذب

مير النصايح ما تفيد إلا قلوب المتقين

حنّا دعاة السلم والإسلام عوق اللي حرب

واللي يعادينا يبا يلقى جزاه بكل حين

وحنا هل الوقفات والمعروف حزّات الطلب

كم جرح ضمدناه حتى طاب وأنتم خابرين

وحنّا هل الحلم الوسيع وتارة شعلة غضب

نرد صاع المعتدي صاعين بالكف المتني

وسكاتنا لو طال ما معناه خوف ولا رهب

إلا نبا روح السلام تسود بين العالمين

وليازمى الحراب ما نحسب حساب أطيب شنب

نذكره بالقادسية والجدود الأولين

وليا دعانا للفدا داع الوطن قلنا وجب

يا قايد الأمة ترانا في اللوازم حاضرين

أبشر بنا يا قايد الأبطال وابشر بالشبب

نمشي على ما قال قايدنا وبالله نستعين

سلمان بن عبدالعزيز مطوع الرأس الصعب

يضرب على روس العدا بالرأي ويفعل اليمنين

واللي نهق واللي نعق تحلحّف الذل وعقب

بالفعل ليناه حتى لان والقاسي يلين

سلمان يا شبه العقاب الهيلعي يوم انتصب

هبّت هبوبك بالسعد واسعدت فيها كل عين

أهل الجزيرة كلبوهم والعرب كل العرب

الصف واحد ملتحم كل العرب والمسلمين

اضرب على حامي الحديد وزود الشعلة لهب

حتى يجونك زمرة الأوغاد خزيا صاغرين

- الشاعر/ عبدالله بن سعد بن ضاحي المقاطي