اعرف انِّك حزينه.. والزمن هذا قليل افراح

حزينه والنفوس بما كتبه الله ماموره

خذاك الليل يا بنت السِّفر والمبْسم الوضَّاح

سرقك وكنتي انتي نجمِتِه وانتي ضوى نوره

ورحتي تطرقين ألفين بابٍ ما لها مفتاح

حزينه مُحبطه متوتِّره.. وجله ومكسوره

وجيتيني وانا ماني طبيب ولا جليس ارواح

يِضُمِّك بالوهم ما بين دخَّانه وبلّوره

يِفسِّر لك خساير ما مضى ويصوِّر الأرباح

أنا شاعر تكفِّي عن ملامح وجهه سطُوره

يديني جرح حرفي.. كلمتي قلبي.. شجوني جراح

أوقِّف والجُروح تمُر وكلٍ ما خذٍ دوره

أخفِّي عن بعض نفسي بعض نفسي عشان ارتاح

أعيش بنصف صوت احيان وأحيان ببعض صوره

حزينٍ ما جرح ليلي شعاع ولا ضحك مصباح

ما هو كله سوا إن هد عِشّ أو طار عصفوره

حسبت ان النجوم أغلى القلايد.. والربيع وشاح

أخذت الحلم بأول بادره واعلنت به ثوره

ما بين الصاحب اللي هام بأول غلطتين وراح

قسا وأقفى يلعِّن حلمنا.. ويهدِّم قصوره

ما بين عيوننا لحظه غوت واستهوت التفاح

ما بين أيام شقت سترها وأيام مستوره

ما بين احلامنا واقلامنا والصمت والايضاح

خطاوينا على سطور الورق وجله ومذعوره

عرفتي ليه صديتك ونطحت الصِّياح صْياح

عرفتي ليه شدَّيت الظلام وغِصت في بحُوره

عشان الأرض جدبا والتَّعب ما يِنفع الفلاح

يحاصره الجفا والبرد.. والقِيعان ممطُوره

عشانِك.. أو عشاني.. أو عشان الليل والمصباح

نعيش بنصف صوت احيان وأحيان ببعض صوره

- الشاعر/ ناصر السبيعي