|
| |
بصمة
جمال الجرح
|
كل أرضٍ تشيلك.. يا ثقيل الحمول |
وكل وقت كريمٍ بالرضا، والزعل |
وين ما رحت تلقى لك حبيب.. وعذول |
وين ما كنت تلقى مثل ياسك - أمل |
يا طريق الترجي، والوله، والنحول |
والله أني مشيتك.. لين حد الثمل |
ما لقيت فوصولي لغير.. قبري وصول |
ولا عرفت فحياتي.. مثل عرفي الجهل |
لا تظن المسافر من يسوق الرحول |
من وقف دون حلمه.. عاجزٍ ما رحل |
وما لمخلوق منجا في الحذر والجفول |
ما تصيب السهام ولا يطيش الأجل |
الليالي خوات، مير منهي: البتول؟ |
والحوادث (عشاير).. مير وين: الفحل؟ |
ليلةٍ لك، وليله.. بالفرح ما تطول |
وليلةٍ من شهدها ذب راس الجبل |
اتذكر في عين الشمس طفلٍ خجول |
شالته في هدبها وقت.. لين اشتعل |
اعجب الناس وهجه بالجدل والفضول |
ما دروا عن (جمال الجرح) لين اندمل |
والله أني كتبته في العطش والذبول |
لين: غصنه تغطى بالورق.. واعتدل |
والله اني كتبته لين قال الجهول |
والله أني كتبته وانتشى واحتفل |
ما أتفه الشعر كانه هالحكي اللي نقول |
لا تعدى المديح ولا تعدى الغزل |
أن لثمت الزهور وصاحبتني الحقول |
ما هقيت أن صافي الشهد عيب النحل |
ما بقى في ضلوعي كود ريح معمول |
وثوب شاشٍ عليه من الندامه وحل |
ألتفت للطريق وما عبر منه زول |
في جفوني تزاحم عبرتي والوجل |
طلت يالعمر والا قلعتك لا تطول |
طاولتنا الليالي بالسهر والملل |
أن تعبنا نحب ولا لقينا قبول |
ما تسر الأماني.. ولا يفيد العذل |
لكن الله كريم وكل همٍ يزول |
ما على الله بعيد.. ولا جفاك المحل.. |
كل أرضٍ تشيلك يا ثقيل الحمول |
وكل وقتٍ كريمٍ بالرضا والزعل |
الأمير بدر بن عبد المحسن
|
|
|
| |
|
