|
| |
لين وإنصاف
|
كيف اب.. اكتب والقصايد شمس والمهموم عاري |
كل ما همّيت في فكره، عصت وادمت يديّه |
والمشاعر ما تعرف اللين وانصاف المواري |
جمرةٍ لو شربوها البحر، وسط الروح حيّه |
يا البعيده لو عرفتي كيف لاهبت طواري |
والحشا عن صدّ بعض الحزن ماله مقدريّه |
الله اكبر كيف وطى الود.. راسه للذواري |
الخوي عقب المودّه صدّ واقفا عن خويّه |
لا تقولي كيف مات النور وارمدتْ بنهاري |
من عرفتك ما خبرت الصبح ولا الشمس حيّه |
يومها بيدي وانا اللي ما ترددت بقراري |
قلت: حر الصيف وعيونك وخليت المطيّه |
كنت احسب اني لمست الغيم واتعبت المساري |
من كثر فرحي.. أعدّ خطاي وآسمّي عليّه |
مير ما فادت مع الفارس معاذير الصحاري |
من قبل عذر الصحاري يرتوي بالمهمهيّه |
لو عرفتي سرّ ضعفي فيك واسباب انكساري |
ما وقفتي مع شقا ايامك ونزواتك عليّه |
لو عرفتي كيف كنت اخسر وانا اشوف انتصاري |
كيف كنت السيف والجاني وجرحك والضحيّه |
ناصر السبيعي
|
|
|
| |
|
