الموضوعات الأكثر
صوت
على الهون يا شاعر مدام القصيد أشباه
يموت التصنع والهزل ضاحك سنه
تمتع بليل ماحمد هاجسك مسراه
تمايل لك أشباحه إلى أردفت بالونه
دعاك البطر يامترف ماحمد مولاه
وشبيت نار الحزن والا أنت في الجنة
جداك الضما لو كنت تدري وش المضماه
وتدرك لهيب القيظ في حومة الكنة
لك البهرج الزايف تسوق الجلب بحماه
وإلى لاح لك قاف على الظم تعتنه
وانا لي هجوس الليل لي عسعسن باتلاه
وخدن العنا والحزن نجر السهر دنه
أقوله وانا لي مرقب كايد مرقاه
تباها به الأمزان في عالي القنة
تعليت به عن واقع داه صار رداه
وفيضت به في غفلة الناس ما كنه
أفيض به هموم تحد الشقي لاقصاه
ولي من يشاركني همومي بلا منه
تسامى سعد عن كل درب يريب أخطاه
ولا اقرع مثل غيره كما تقرع الشنة
على المنهج الوافي ترافقت أنا وإياه
بشهب الستين وكان ضني على ضنه
رفيق إلى منك بغيته تبا تلقاه
ولا فيه عند الجد هلة ولا لنة
** ** **
صدى
عليت بمقامك مبدع هاضني معناه
بعصر الصخب غر القوافي بطيعنه
هتف لي وحرفي بين همي وحزني تاه
تركته أسير بين الأضلاع له رنة
سنين مضت والنهر جف وهجر مجراه
وأشوف الصغار من الزعانف تقفنه
ولا ظن ما يجري بساحاتنا يخفاه
حروف المعاني من عناهن ينادنه
غدا النقد شرعة عاجز تاه في مسعاه
تعاليه وأوهامه على الظلم ساقنه
بنا بالوهم له عالم بالجهل وشاه
يكيل الروابع والتخاريف يردنه
تباكي بقيله واثر شعر الملا ينعاه
ثوا للغثا يوم الفريدات خلنه
يهد الجسور وراعي الطبع ما خلاه
فقد كل أحاسيس عن الغدر ساقنه
تمادا يبي هز الجبل غرته دنياه
تهاوت قرون الوعل يبكي عليهنه
رميت اليراع ولذت بالصمت عن طرياه
وجزلات أبو متعب على البعد يرونه
عزيز بحزات الظماء مد لي يمناه
يعسف الصعاب وكن تصخيرها فنه
اخو لا عجزت اصل لعد يجي شرواه
أشوف المشاعر لدهر الوقت ينخنه
ولا شاورني في تنصيه لا والله
وأنا أخشى عليه من الصواديف واحنه
وقف في مقام الحق شيطانهم مغواه
على النهج يوم إن التلون لهم سنة