صاحبك في وقت الليال الشديدات

والاّ الرخاء كلٍ يلاقي عبوره

في ماضي الايام برهان واثبات

عيبٍ على الرجّال تقصر شبوره

هات العلوم اللّي وفيرات جزلات

علم الضعافه للرجاجيل عوره

في خدمة المحتاج مالك مدارات

ما دام تقدر بالعطا والمشوره

وقّف معه لا تتركه للعسيرات

يكفيه هم الوقت ضيمه وجوره

والضيف لامن جاك هات السمينات

اهلاً هلا يا مرحبا في حضوره

العود الازرق والدلال النظيرات

فنجالها بين النشاما مروره

والكلمه اللي طيبه خص بالذات

مثل الحيا في الارض ينبت زهوره

مفتاح لـ ابواب القلوب الصعيبات

تدخل بها والود تبني جسوره

** **

- مقرن بن متعب الهرف