الجزيرة - واس:

(عِشْق الوطَنَ)، عنوان لقصيدة نظمها صاحب السمو الملكي الأمير خالد الفيصل بن عبدالعزيز مستشار خادم الحرمين الشريفين أمير منطقة مكة المكرمة بمناسبة اليوم الوطني الخامس والثمانين للمملكة العربية السعودية، قال فيها:

عفّ الزمان وكل شيٍ معه عف

إلاّ الوطن والله ما عنه عفّيت

أشّر لي بعينٍ هدب جفنها رف

وانا له بعين المحبين لبّيت

خمسين عامٍ أعاشقه والهوى زف

زفّـة عروسٍ في هواها تغنّيت

أبا اخدمه بالقلب والعقل والكف

وابا اكتبه حيٍ ويبقى وانا ميت

الحرف باقي والقلم ما بعد جف

هو لحني ومعناي هو قافي البيت

بيني وبينه رابط الحب يلتف

يخصّني وانا له العمر خصّيت

هو عشقي اللي ما تراجع ولا كف

أشيت وحبّه في وهج يوم شبّيت

عطيته الحاضر وفي خاطري شف

أبيه باكر ياصل اللي تمّنيت

أبيه بين أوطانها عالي السّقف

مابي ولدنا باكر يقول ياليت

وشلون ما احبّه وهو ناهي الوصف

لو قلت ما مثله فانا ما تماديت

يفرق على الأوطان بالراس والأنف

هو موطن المبعوث هو موطن البيت

بارفع له الرايه وباقرع له الدّف

والسّيف لعيونه من الغمد سلّيت