نسيتني علّمني شلون ابنساك

في هالزمن نسيان الأحباب عادي!

وشلون لامرّت على البال ذكراك

وطيفك سرق منّي لذيذ الرقادي

وشلون لاقالوا لي الناس وش جاك

من كنت في لذّة منامك تنادي؟

وشلون أعيش اللّي بقالي بليّاك

لامن غدينا كل واحد بوادي

لو قلت أداوي جرحي اللّي تباطاك

ما كل جرح يفيد فيه الضمادي

اعلنت حبك لين كلٍ تمنّاك

غلطه وغيري من خطاي استفادي

لو لي مثل قلبك تمنيت فرقاك

وأكيد قبلك بالجفاء صرت بادي

حلوه عذاريبك وحلوه مزاياك

حتى بيوم فراقنا كنت هادي

كن الليالي ودّها تكسب رضاك

وأنا يطول مع الليالي جهادي

في ذمتي ما هي غريبة خطاياك

مبطي وقلبك لو تنبّهت غادي

سهلة على من كان مثلك وشرواك

مثل الثياب يغيرون المبادي

علّمني أكره ذكرياتك وطرياك

وأنسى من الليله صدوق الودادي

ولاني بقايل عقبها وين ابلقاك

راضي لو ان جروح قلبي جدادي

والاّ القصايد جعلها من فداياك

لبّستها مبطي ثياب الحدادي

** **

- متعب التركي