أحمد الناصر

يا مرحباً بالعميل اللي طروقه بالمحاضر جداد

عداد وبل المزون اللي تهز الضلع بروعودها

يا لله عليك اتكالي يا عظيم الشان والاعتماد

يا مدّبر الكون دبّر نفس عبدك وأنت معبودها

لويحان:

شبّيت واليوم شايب ما تبعت اللي يحب العناد

تلطم خدود الأوادم وأسود اللطمات بخدودها

ياما اعتدوني وجوني مار صار الدرب صعبٍ سناد

والناس لولا حمقها طمعت الأجناب بحدودها

أحمد الناصر:

ما وكَّل آدم على ذرّيته ربك وكيل العباد

خل الأوادم تصادم خيل طاردها ومطرودها

ياللّوح كلٍ إلى جيته يقول إنِّي عقيد الشداد

والطيّبه هيّنه في حال والاحال ياكودها

لويحان:

أنا أدفن القرص في جمرٍ تلظَّى ما ادفنه في رماد

أحب بيض المعاني كلّها ومجنّبٍ سودها

من طرّد الهرج يلبش ثم يبلش مثل داب الجراد

الناس تفهم وتعرف طيّب التمره بعنقودها

أحمد الناصر:

إن شفت لك مجتمع ما ترغبه جنّب وصر بالحياد

تمسي وتصبح سليم ولا يجي سمعتك منقودها

خل السوالف تجي وتروح قدّام الشتاء والبراد

ودّك تسولف ونفسك ما درينا ويش مقصودها

لويحان:

أنا على الشاعر المتكبّر المرجوج مالي جلاد

أقول ويقول غيري كل نفسٍ نقصها زودها

يقول أنا الشاعر اللي ما ظهر مثلي على وقت عاد

شعره على ناس مثلي مدّها من قل ما جودها

أحمد الناصر:

الحمد لله لاقومٍ تصبّحنا ولا من هجاد

والناس بالملعبه ياللوح تبذل كل مجهودها

خابرك فيما مضى رجلٍ صبور وفالمحاضر ستاد

مالك ومال العرب والناس تنحى الناس بزنودها

لويحان:

ما أحب كشف السراير والمعاني في ضميري جداد

يومٍ بعض العرب يدخل على الأموات بلحودها

الفاهم الفاهم اللي شاطرٍ بالحل والانعقاد

ما هوب يرمي من الجمرات في غيّات بارودها