بعذر السحاب اللي ترزّم ولاهل

على دروبٍ ضايعٍ من رجاها

ما باقي إلاّ شجرةٍ مالها ظل

لو الجراد يمرّها مارعاها

الصاحب اللّي لا تعذّر ولا مل

وش بعدها وش عقبها وش وراها

كم له وهو يخطي وأنا أقول مازل

من يفقد بيوت الحيا ماعطاها

عذبتني ياراعي الطرف الأكحل

ليت الظنون جروح والقى دواها

ليتك عدو وارتاح من شرهة الخل

ولا تلحق النفس الوفيّه وفاها

ماهو شجاع اللي يشوفك ولا ذل

من خاف من عين المحبه حماها

ما اقول وش يفرق عيونك عن الكل

الكل في عيونك ولا أحدٍ ملاها

** **

- هلال المطيري