عدّيت لولاحٍ رفيع الحجايا

في راسي ملموم ألقرا قمت أحنِّي

كني خلوج يوم صفق الرعايا

تحن بالمفلا لما روّحني

على ولدها كيف سوت سوايا

طبايعٍ ما ظنتي يعلمنّي

ساجت وراجت ما لقت له حلايا

وخرشت ونشّت والقوايم جثنّي

تصنْ مثل اللي ايوصَّا وصايا

تبي لعل سموعها يسمعنّي

لاجت وشاقت بالنواظر هفايا

حوايمٍ على مداسه هفنّي

جتهن وشافت بس نثر الحوايا

وجلده ومدراج الحمر يوم ثنّي

وعرفت وشافت من لحومه شوايا

تقات بطيحه والظلوع اعولنّي

والذود ما بين الضلوع الحنايا

قطع علايق قلبها وأصرمنّي

جرحي غميقٍ مثلها بالتهايا

عِدِّيت والمجمول عَدّوه عنّي

لا واطعوني بالظماير هوايا

ما حذا عيونٍ بالحشا يفرغنّي

ياما عليك أشرفت حوض المنايا

والا إنت غافل تقل ماسلت عنّي

طاوعت بي هرج القفا والحكايا

وتطريد هرج الناس كثره ايعنّي

لا واهني من مَزْهاك الشفايا

من ذبّلٍ كن العسل بينهنّي

لا صدرت منها حيامي روايا

من البيض غيره جعلهن ييبسنّي

هولي نحبه والعرب له نحايا

ودون النحايا القلب ما يرجهنّي

ولا انا بحال اللي جداه الزرايا

حباله عن اللي يشتهي يقصرنّي

** **

- سويلم العلي السهلي -رحمه الله-