شعورٍ من عرفتك هو يجيني ما قدرت أخفيه

أحاول وصفه بجزل البيوت ويعجز لساني

عيوني ما تبي تنظر عيونك وانت من عينيه

أشوف برمشها الغربه وأول وآخر أوطاني

أنا ما انكرت عشقك في فؤادي وانت تدري ليه

فرح دنياي عشته في هواك وعشت حرماني

يمر الغيم في روض الأماني وانتظر يسقيه

ولا حنَّت هماليله على الظامي من أغصاني

وأجي لك مبتسم والحزن كلّه والأسى ما أحكيه

مكفّي دنيتي يبكي خفوق ويضحك الثاني

حبيبي من سواك اللي نزعلهم لجل نرضيه

ما أبي تزعل عليَّه لا تكرّر كبوة حصاني

أنا لو هو بكيفي جبت حلمك ماسكه بيديه

واقول انت الوحيد اللي أشوف بطيفك ألواني

أبيك تمد لي كفك حبيبك مدّ لك كفيه

مشت رجليه في دربك ودربك وين ودَّاني

أشوفه معشب وأمشي واحس ليا مشيت بتيه

تضيع خطاي في عتمة دروبك وانت عنواني

طريق العمر ياليته تبيّن لي قبل لامشيه

علشان اتجنَّب كل مسيرٍ فيه عنّاني

ولا يعيش الخفوق اللي يجيه الطعن من غاليه

يعاني كثرة جراحه ويمكن عاش وحداني

ولكني بشر رزقي على اللّي من سجد يدعيه

عطاه من السعادة ما يبدِّل سود الأحزاني

أنا العبد الفقير اللي رجا رحمتك يا واليه

دعيتك جل شانك يالكريم وعالي الشاني

** **

- صالح محمد العنزي