البارحة ما ادري وش اللَّي خذاني

يوم اجنبوا عنِّي من الضيقه اشملت

جيت أتكلَّم بس عيَّا لساني

ما كنِّي إلاَّ مرتكب ذنب وأخملت

الله يسامح من ذكرت ونساني

وأنا أدري إنِّي لا ذكرته تجمّلت

عانيت وأدري كل طيّب يعاني

وعلى حساب طعوني الخضر جاملت

ياما خذوا منِّي ولا أحدٍ عطاني

من طيبتي في حق نفسي تساهلت

عزاي لامنّه تجهّم زماني

يمّمت وجهي للكريم وتوسَّلت

واللَّي يبي قربي وبعدي لقاني

أمشي على وضح النقاء ما تختّلت

يا من سكنت أجمل زوايا كياني

يا ما على نفسي عشانك تحاملت

مرَّات أحس إني معك شخص ثاني

ومرَّات أحس إنك حبيبي وما زلت

لا تفرح إنّك دجت بين المحاني

لو ما تخون الذاكره ما تسلّلت

عشان ماضيك الجميل وعشاني

حاول تشيل من الوفاء ربع ما شلت

ماني على خبرك حبيبي تراني

حتى عن اصغار الأماني تنازلت

** **

- متعب التركي