من يقول إن عيني ليلها ليل
من يقول إني أزعل وأتشرَّه
السعد صعب في وجه المقابيل
بين برد الغرام وبين حرّه
ما بقالك تحت جفني مراسيل
وانا ما اشوف بعيونك مبرّه
والمشاعر بصدري مابهن حيل
مرجهنَّات والقلب بمقرّه
توّي أضحك على ليل المهابيل
تو عيني تعرف النوم حرّه
وتو خدّك تساقيه الهماليل
شفت كيف الدموع تكون مرّه
كان للدمع في كفِّي مناديل
وكان للحزن في وجهي مسرّه
كان للحب في صدري مواويل
كل صوتٍ يبي لاماك أجرّه
يوم تطربني السود المظاليل
بين بارق خدود وبين غرّه
يا آدمي لا تقوم تحط وتشيل
أنت عشقٍ كفانا الله شرّه
تحسبنِّي غشيم الحب وحليل
يلبس الثوب أبو ذل ويزرّه
أنت ما تدري إنِّي من رجاجيل
مالهم عند باب الذل جرّه
- ضيدان المريخي