في البال سجّة عبدلي ما له أرباح
إلا غناة الروح من ورث جده
وين انت ياللِّي للسواليف لمَّاح
تأخذ كلام الحال والاّ ترده
ما همني من باقيٍ لي ومن راح
بين البيوت العامره والاشده
إلا ازرق من نايد الناس مزّاح
الله على مزحه وضحكه وجده
هذاك ياقربه من القلب يا صاح
لو المسافة عن تسعين شدّه
عرفت منه ان الغلا وصل الارواح
وعرفت منه ان القرابه موده
لو راح غيره قلت مذلاف وضاح
مانيب قايل: جعل ربي يرده
ولو طاح من عيني عزيزين ماطاح
وياكثرهم من زدت بعده بصده
لليوم عندي من هداياه مسباح
ولليوم عندي من خطاياه ودّه
لا تقول لي: وشفيك؟.. مانيب مرتاح
جالي على هالحال ياخوك مدّه
اما يجي للحظ بابٍ ومفتاح
والا عسى الأيام ضيقٍ وشدّه
ماغرني في صادق الطلع ملواح
لي من وراه اليا صفا الجو هدّه
ولا نيب محتاجٍ من الناس مصباح
لا أعجبني الطاروق عندي مشده
لي مع هل الردّات نوهه ومرواح
ولي مع هل الردات لاجيت ردّه
هذا مكاني بين هاجي ومدّاح
موجود لي وان غبت محدٍ يسدّه
- هلال المطيري