انا بنظم الشعر ما كان لي غاية ومقصود

لكن حب الوطن يفرض علي النظم زودي

حيث ان حب الوطن واجب على الانسان منشود

والواجب اللي علينا للوطن ما له حدودي

واليوم راحل عن ارجاء الوطن رجال مفقود

مار العزا في حكومة ترأس الشعب السعودي

سعود بن فيصل اللي في المواقف كان معدود

يالله تجعل عوضنا خير بعدك يا سعودي

اللي قضى في الشؤون الخارجية خمسة عقود

شخص محنك سياسي كان لامثاله يسودي

كنا نريدك طوال الوقت في مركزك يا سعود

لكن ما للعرب حيلة وعن مثلك نذودي

وان قالوا الناس فيصل قلت انا لا زال موجود

ان روح سعود خالد لأسرة الفيصل يقودي

حاكم بمكة ومع سلمان يبذل كل مجهود

هو مستشار الملك وبرأيه الصايب يجودي

الغاية انّا بخير ولا يزال الحبل مشدود

الحكم فيه الاسود ومن يجي مثل الاسودي

مادام في حكمنا سلمان سيرالحكم في صعود

الله يديمه لنا يوعد ويوفي بالوعودي

الرايد اللي رضا الخلاق له غاية ومقصود

لعل عمره طويل وكل عام فالوجودي

ومحمد النايف اللي كل يومِ فعله يزود

همة محمد تصد الخصم وتكيد الحسودي

والناس ذا شانها والفهد دايم حوله فهود

وانا غاب فهدِ يجي بعد الفهد جملة فهودي

والشكر لله ما غير الله المعبود محمود

اما المخاليق دايم صادرة بعد الورودي

- حسين بن مريع العبيدي الحربي