الموضوعات الأكثر
بكيت يا لافي لو ابْكا الرجل عيب
من ضيقتي لاضيّق الله مساعيك
تمشي بي الدنيا وبخطي وباصيب
لو كنت عن درب الخطايا موصيك
أعلم يبوك أن الليالي تجاريب
واللي يصيب الناس ماهومخليك
يبوك انا عودٍ غزى راسه الشيب
وفيك الأمل لاخيّب الله راجيك
أوصيك في تقوى وسيع المطاليب
ربك اليا ضاقت يسهّل مماشيك
والعاني العاني لدار المعازيب
محتاج والحاجات بالعمر تأتيك
قم وانطحه وأكثر جزال التراحيب
بصوتٍ يبشر بالسعد وجه ناصيك
قلط له الجزله ولا تكنز الجيب
ترى ستر وجهك بما تبذل يديك
ربعك تبرك بالصحن شمخ النيب
أنت افتخرفيهم وأنا بفتحر فيك
واحذر من الأصحاب قبل الأجانيب
اللي عن دروب الرجاجيل تغويك
يا مكثرالأقراب لك والأصاحيب
ما دام ربك عن عطى الخلق مغنيك
ويا قلهم وان بان في حالك العيب
مرات ما تلقى رفيقاً يخاويك
سود الوجيه مشذبين العراقيب
أحذر مبدلت الخوي لا تخاويك
ذولاك وإن تابعتهم بالمذاهيب
جابوك تمشي للمذله برجليك
بعيونهم تزداد فيك العذاريب
يحصون سياتك وتِنسى حسانيك
ان كان مالك موقف مهيب ومريب
إياك تأمن طعنةٍ من مصافيك
إن طارت الهيبة من الوجه يا ذيب
مامن غرابة لو تخيفك حصانيك
دنياك لوجادت بعذب المشاريب
بنكباتها من علقم المر تسقيك
خلك حكيم وحافظاً للمواجيب
واحذر عِقاب اللي يميتك ويحييك
- الشاعر: سايل بن لافي الصوالحه الشراري