الله يعين اللي ليا سج خاطره

خطر على باله ثمانين خاطره

اليا قبل ظلام الليل داوم على السهر

ماحدٍ على كثر الروابع يشاطره

يجحد صوابه ويتصبر وينتظر

للموعد اللي طوال الأيام ناظره

ما همني هرجة هبيلٍ من الملا

ما جرّب الشدات والمال باطره

أكبر همومه بس نومه وعيشته

ولا الفخر ماهوب ياطا مخاطره

إلى ملا بطنه وكبر وسادته

يعد نفسه من كبار الأباطره

رايه وتدبيره على خيبة الرجاء

من خلقته والله على البخل فاطره

ما شاقه النوماس والجود والثناء

حتيش لو المال يملك قناطره

ما قال يوم للمسايير مرحبا

ولا شافهم كنك على الوجه ساطره

أقولها وأنا مع الناس غايتي

السيره الي طول الأيام عاطره

- الشاعر: نايف بن غتار الرويس العتيبي