بروق الوسم لاحت وانعشت معها جميع الناس |
تكاشف بالمزون اللي تزبر في مناشيها |
تسير البال وتزيل الهموم وتبعد الهوجاس |
مناضرها سعادة باول الدنيا وتاليها |
وهلّت فوق الارض وسيلها ما ينحصر بقياس |
تباشر به رجالٍ ترتجي مدات واليها |
والى بين نبات الارض جاب اخبارها العساس |
يوصفها ويذكر كل نوع من نواميها |
علومه شدت اهل الذود مبعدة الجزع والياس |
رجالٍ بالمواقف ما تخلى عن مباديها |
اهل صفر ومجاهيم وشعل يبرى لها النوماس |
واهل وضح مشاهدها ينومس قلب راعيها |
تميز طيبها وعموقها معروفة من ساس |
ولا يخسر بوسط السوق بايعها وشاريها |
لها قيمة ثمنها ما يوصف بالذهب والماس |
تشرفهم ليا جاء بين كل الناس طاريها |
تماري بالوصوف الوافيه لو وصفها حساس |
ولكن وصفها ما هوب خافي عند اهاليها |
مثل ما قيل طفح وجيه وارقاب وضخامة راس |
عراض الخد جمل وجهها حنوة عرانيها |
مزاياها كثيره ما عرفها الا قوي الباس |
هذاك اللي يباريها ويندبها باساميها |
قطع فيها الفيافي ما وقف من دونها حراس |
ولا يرتاح باله لين ترتع في مفاليها |
أحمد بن سعود الحمد - الزلفي |
|
