نوارة الغيد.. فكري دق هوجاسه |
وعلى غصون المشاعر غنت الورقا |
دعاه قلب غمرني صادق احساسه |
وخاويت قمرا الليالي والسماء زرقا |
الطيب من طيب ذاتك فاحت انفاسه |
وهتان صوتك روت به كبدي الحرقا |
الغيد عندك جواهر وانتي الماسه |
يا عين شيهانة في كايد المرقا |
لطفك وعطفك.. بقلبي صعب مقياسه |
ومع دورة الوقت قدرك بالحشا يرقا |
صدري يا نور الصباح اهتزت اقواسه |
لا عاد يوم الوداع وساعة الفرقا |
برق الحيا هل ماه وهب نسناسه |
واسعدت في جيتك لعيوني الغرقا |
اقوم واطيح.. عزمي ما انكسر باسه |
ما شلت هم البحر وطيوره البرقا |
حلفت لو يوم موتي دقت اجراسه |
ما اخون عهد الوفاء يا الجادل الطرقا |
رشيد الفريدي |
|
