الشعر ديوان العرب عبر الأزمان |
ويا عيد أعرفك تعطي الشعر حقه |
شاعر ولك في ساحة الشعر ميدان |
تاخذ جلاله وتعذّر لدقه |
وأنا بعد في عالم الشعر لي شان |
لي فيه من بين الشواعير حَقّه |
والشعر بحر فيه لولو ومرجان |
ويحتاج من عنده درايه ودقه |
واليوم أشوفه سلعة ما لها أثمان |
ناس عقب وقت المعزه تعقه |
تكتب على كل القوافي والأوزان |
وكل على ليلاه طبله يطقه |
الوضع ما يرضي رفاقه وعدوان |
وصوت الضمير الحي يندّه بوقّه |
عن كل ما يخدش مقامه وينهان |
تراه زرع باعذب الفكر سقّه |
لو السديري عايش عصرنا الآن |
ويشوف حاله كان جيبه يشقه |
وحنا طلعنا به على راس ما بان |
وتكرم جنابه لا يجي فيه دقّه |
ولا يبي من يرخصه سر وإعلان |
ووجه الشعر عن نازل القول رقّه |
ما فيه داعي نخرجه دون ميزان |
وله قيمةٍ عند العرب مستحقه |
تكتب لعين فلان ولخاطر فلان |
ولا حصل غير التعب والمشقه |
بس النتيجة صاحب الزرع خسران |
مثل الذي يدفق صميله برقه |
ودّك إليا قلته من شعور ولسان |
ما يطلع إلاّ بواحدٍ يستحقه |
نهار بن ممدوح |
|
