|
| |
ساهر لحالي
|
بعد ما قلبي تولع بك وحبك تهجريني |
تتركيني مع جروح الحب وسموم إلهايب |
تتركيني ساهر لحالي وظنك ترقديني |
ما وطيتي جمرة العشاق يوم القلب ذايب |
يا حياة الروح بالله لو سمحتي صارحيني |
ويش غير منهجك من دون ذنب ولا سبايب |
ليه دايم لا زعلتي بالخناجر تطعنيني |
وأنتي أدرى في غلاتك ومنزلك بين الحبايب |
بعت كل الناس لجل أنك لقربي تشتريني |
ما دريت أنك على قبري ترزين النصايب |
ولا دريت أنك بسرعة تقلبين وتجحديني |
وتسمعي هرج العواذل في حبيبك والقرايب |
كنت أحسب أني ملكتك يوم كنتي تعشقيني |
والدليل أني عطيتك قلبي العاشق وهايب |
كنت أمسح غلطتك دايم ولا أرضى تزعليني |
وأنتي دايم تحسبين الحب مزحات وطلايب |
تجرحيني لازعلتي وأن رضيتي تجرحيني |
لين حالي من عنادك راح يا عمري نهايب |
ويش ذنبي في غلاك ويش يطلع في يديني |
كل ما تخطين بتحمل خطايك المصايب |
يمكن أنك مع مرور الوقت بكره تندميني |
وتعرفين أني بقولي يوم أعاتب كنت صايب |
وتعرفين أن الغلا ما هوب ضحك ودمعتيني |
الغلا شي من الله يحيي قلوبٍ عطايب |
أذكريني أذكريني أذكريني أذكريني؟؟ |
لا حيا بستان حبك ومطرت فوقه سحايب |
وأذكريني عاشقٍ مغرم على مر السنيني |
دام حبك في عيوني ثامن السبع العجايب |
خالد بن سكران /دولة الكويت
|
|
|
| |
|
