|
| |
نار حبك
|
يوم ضاق الغلا بي من يمين ويسار |
قلت ابحيا وأنا اللي في غرامك دريك |
جيت ابهدي يدينك من قصيدي سوار |
قادني لك غلاي وجيت لك يا مليك |
جيت أدورك جنة.. واثر جنتك نار |
آه.. من نار حبك حسبي الله عليك |
بين بعدك وقربك ما وصلت لقرار |
مرة أنسى هواك.. ومرة أموت فيك |
في محيط المشاعر ذكرياتك مدار |
مبتليني وصالك والجفا مبتليك |
اذكرك وانت غايب شوق في كل دار |
واحسب انك معاي لين اعود واجيك |
اتناسك مرة.. واتذكرك مرار |
محرقتني بنارك بين هذي وذيك |
افتقد كل حاجة لا فقدتك نهار |
واي شي ابيه القاه موجود فيك |
عذري اني احبك لو تموت العذار |
وعذرك انك تحس وتدري اني ابيك |
المهم ان غير ما له اي اعتبار |
كل قلبي خذينه انت ما لك شريك |
انتظرك وجيت بلهفة الانتظار |
دوك دقات قلبي كلها تحتريك |
لا ذكرت الوعد قلبي من الشوق طار |
بين لهفة لقاي وبين رعشة يديك |
صرت من كثر حبك من محبتك اغار |
شفت وشكثر احبك حسبي الله عليك |
عوض القوانة
|
|
|
| |
|
