الموضوعات الأكثر
زعيمنا سلمان للخصم نطاح
ومحمد اللي بطيب الفعل ممدوح
العاهل المحبوب للخير مفتاح
وباب المكارم دوم للشعب مفتوح
ما هو للي يدني من الحد سماح
ومن يقترب لحدودنا غير مسموح
عزوة هل العوجاء اليا صاح صياح
باكوار ضمر او على سرج جاموح
من يوم كان الحرب بسيوف ورماح
نطيحهم في ساحة الكون مذبوح
صديقهم مسرور والفكر منساح
وعدوهم قلبه من الغبن مجروح
عدوهم في جوفه احزان واتراح
يرجع معيف وينثر الدمع بالنوح
يقفي من اللوعه ثناياه كلاح
ريقه يبس يحوح والصوت مبحوح
كم فارس صنديد من ضربهم طاح
وقع طريح وصاخن الدم مسفوح
حد النمش لصدور الاضداد سطاح
واللي يخون العهد بالجوف مردوح
هم مزبن الخايف الياصار وحواح
فعل فعل ماهو عجاريف وامزوح
افعالهم يوم النضا مثل الاشباح
علقم على كبد المعادي وذرنوح
يوم الركايب بالمناعير طفاح
ياما قطعوا بالبيد من خايع وسوح
بالعصر اللي به خز خلفات والقاح
يوم القبايل بين شالح ومشلوح
جيش الوطن دونه يفادي بالارواح
والنصر للي بالوغى يرخص الروح
من فضل رب الكون نور الامل لاح
وفي قدرت الله ينعثر كل مكبوح
من حالف المجوس مانال الارباح
ومن اعتزا بالرافضه عاد مكسوح
ناتيه باللي جريها فوق الارياح
مقذوفها بالقاع به عج مكثوح
يالحوثي احذر وافهم العلم ياصاح
مجدك خيال وبه حراديب وكلوح
يشبه سراباللال بالدو ضحضاح
ما يروي الظامي اليا جاه مشفوح
اهل العمايم كيف تدعمك بسلاح
الشعب جايع وانت عايش ابحبوح
كانك تحسب الحرب مكشات سواح
شف القنابل فوق راسك لها ضوح
يالحوثي الغدار نخبرك بايضاح
العلم لك يا تايه الراي مشروح
ان كان مقصودك عناد وتبجاح
تطمن وحنا بفعلنا نصعد صروح
قايد مجوس الفرس للشعب سفاح
اللي له بكيد العرب شف واشبوح
يذكر نصر ذيقار بالعصر اللي راح
حاقد وعنده ذنبنا غير مدموح
يوم الملك لاذ نعمان بهاك الناح
زبن لهاني عقب نكبه وساموح
وهاني نخى شيبان ولعزوته صاح
جزم وهو ماله من الحرب مصلوح
كسرا طغى ولساير الشعب ذباح
باد العرب من سلطة الحكم ممنوح
باغت بكر جيش الاعاجم بالاصباح
واذواد بكر معقله مابها سروح
بكر وعنزه جمعهم للعدو زاح
ردوا جحافل جيش كسرى بعد شوح
الفرس في ذي قار بارواحها شحاح
شجاعهم منحاش والصدر له فوح
كم راس مجوسي تدحرج بالابطاح
مثل الحدج بالريع تلقاه مطروح
جيش العجم ساداتهم دمهم ساح
برويز والهاموز بالقاع مسدوح
وغنت نساء بكر باهازيج الافراح
ولا نال من هند العرب كل سلتوح
العزوه اللي هزوا الرمح بالراح
من ضربهم جيش العجم هج بنزوح
ياما بهم من كل منعور واشناح
يوم التقا الجمعين ماح العدو موح
واقسم ابن سيار ما يقبل مراح
مادام ينظر بيرق الفرس مشتوح
سهران ما نامت عيونه ولا ارتاح
وقال انا ثابت ما تزحزح ولا اروح
وصار لهوادج جملة البيض طراح
وقال امنعوا يا قوم عن كل مملوح
وشاعر بكر ميمون بالشعر صداح
يبدع قصايد باح سده بها بوح
والقايد اللي شاف في بكر ميلاح
قاد الجيوش وثم دوبح مع اللوح
هرب وذل وله مع الجرف مطباح
تاه الدليل وضاع ما يشبح الدوح
قاد الجيوش ولا قبل نصح نصاح
اللي هجم مع العجم صار مفضوح
مصادر التاريخ مظمونها اصحاح
تاريخ وقعات العرب ليس ممسوح
هذا الوكاد ولا حكا العلم ذراح
كل الحقايق ثابته من عصر نوح
قلته ولاني بالمخاليق قداح
والحق مسلاكه ممهد ومبروح
اعتز باللي لعالي المجد طماح
واعاف صحبة كل خايب ومريوح
القاف نظمته كما نظم مسباح
صافي مصفى من شهاليل نقروح
هداج ما جمه كما الرس نضاح
وعمق البحر ما ياصله كل سابوح
** **
- عبدالله العبار العنزي