جانا من الأخبار ما سبّب الكدر

عن أمننا عن شرعنا عن عوايلنا

بعض العلوج خساس ما كذبوا خبر

لوبي ودايم بالدسايس يكيد لنا

النار قد تأتيك من أصغر الشرر

شوكة صغيرة حِيْل ممكن تعلعلنا

بعض الدول ما يجيك منها سوى الضرر

واخلاقهم وطباعهم ما تعودْ لنا

يا ميرنا المحبوب يا مصدر الفخر

رسمت خطة وانت حتماً توصّلنا

خمسك بعون الله مع شعبكم عشر

والعز والطولات دايم تعود لنا

بتشوف منا الجد في ساعة الصفر

والحرب والشدات أبدْ ما تجفّلنا

في ظل مَنْ مقامهْ أكيْدْ بالصدر

أبو فهد للعز بالعون يُوْصلنا

الحاكم اللي دايمٍ يعشق الضّفر

سيفه على الأعداءِ بتّار ومحنّى

خير السعودية كما السيل مُنهمر

تغني شعوب ذاقت الفقر والمنّا

تهدي وتعطي بالملايين وتْغمر

واللي يسالمها بيسعد ويتهنّى

انشد عن اليابان والهنديّ الحَمَرْ

ومن ينشر الفوضى ومن ينشر الخَنا

نقطة وابيك تحطها باخر السطر

هرج مثل هذا أبد ما يمثلنا

** **

د. فهد بن سعود العصيمي - جامعة الإمام محمد بن سعود الإسلامية