من اولٍ لاضقت آعدّي المشاريف

والحين آوّزع ونّتي داخل الدار

ياكبر همٍ تحت عوج السراجيف

مما حصل دمعي على الخد مدرار

رسولنا وصى على الجار والضيف

والجار قبل الدار والجار لو جار

لاشك هذاالوقت قد صار به حيف

كم واحدن ماعاد ينشد عن الجار!

من أولٍ يُعزم. على الطيب.والكيف

غالي و له في داخل القلب مقدار

واليوم لامنشود عنّه ولاشيف

اتقول ماباقي على الارض ديّار

حتى الزياره لبّسوها. تكاليف

وحجز ومواعيدٍ على كل تسيار

ياوجد حالي ياحياة التحاسيف

القلب موجوعٍ على كل ماصار

كنت أحسب الدنيا تجي دايمٍ ريف

ودلالنا تبقى على صالي النار

وتحلا الليالي. والسهر والسواليف

في مجلسٍ مافيه حاسد وثرثار

تم الجواب بدون زيفٍ وتحريف

وسلومنا راحت مع الوقت تذكار

** **

- عزيزة آل ثامر