سَطّحْ علاقاتك علشان ترتاح

أقسى جروح الوقت سبّة ميانه

طبع البشر مثل المرايات يا صاح

الشيء فيها عكس واقع كيانه

رفيق واحد بالشدايد لك سلاح

أبرك من أمْيَه ماعليهم ضمانه

عيش العمر بين التجاريب سوَّاح

وأرحل بذكرْ ينبكي لك عشانه

ولا تامن الدنيا ليا ذقت الافراح

مهما صفت لك تب تذوق المهانه

تلعب بنا الدنيا كما لعب مسباح

شطرٍ عليه العود.. ما أفصح لسانه

لا تفرح بطيحة عدوّك ليا طاح

تَحَمَّد الله.. حط نفسك مكانه

مو شرط تصبح كل الأوقات لَمَّاح

ترى التغابي من فنون الذهانه

وإكرم ولا تحسب مخاسير وأرباح

غير الكفن ما أحدٍ خَذَا من زمانه

لابد وقت تفارق الروح الأرواح

وكلٍ حسب فعله يحدد بشأنه

يومًا يفر المرء من هول مالاح

عساي من عقب القبر في جنانه

والعقل هو منجاتك بكل مرواح

مابه نجاح إلا وراه الرزانه

والحب لابواب الملذات مفتاح

يعيشها من هو وفاله وصانه

بس البشر بقلوبها سم وارماح

تتقن بكل اخلاص دور الخيانه

نبدأ نحس بقيمة الشيء لاراح

ويومه بآيادينا جهلنا مكانه

** **

- أحمد الردعان