حبك تمكّن في خفوقي وناشه

وقلبي ضعيف وحاجته فانتعاشه

غايب وعيني تنتظرك وتحرّا

والزين وجهه خاصمته البشاشه

هجرك يورّدني حياض المنايا

وضلوع صدري من غيابك رعاشه

أرسلت لك من عقب عامين مرسول

عل وعسى غيمك يبيّن رشاشه

لا عاد مرسالي ولا جتني علوم

والخوف.. طير الحب غيّر عشاشه

مدري نسيت الوعد والا تغانيت

والا البْعُد نسَّاك حلم الفراشه

طال انتظاري والعواذل كثيرين

وفستان عرسي ما تخيّط قماشه

ليت الليالي ترجع وحلو الأيام

وليت الوفا ما تعتليه الهشاشه

رد النظر صوب الهوى والمحبين

لا تنتزع من وسط جوفي حْشاشه

** **

- حنان آل فاضل