لا تسأل يا زماني عن غيابي والحياة ظروف

لو أتعب لجلها ما غيرّت نهجي ولا مبداي

أنا طيّب وماخذ راحتي ولا عليّه خوف

أوقّف للّيالي السود وأغنّي على ليلاي

ولا غنّوا من الحد الجنوبي لاسكاكا الجوف

خذت القاف كنّي ماخذ المسباح من مخباي

أشد العزم وظروف الزمن تلعب على المكشوف

أقابلها على دربي وأحصلها على مركاي

يا واقعنا وقعنا وانتهى الموضوع ويش تشوف

علاقتنا مع الأحلام من ضحك الوجيه وجاي

ما نفرح غير لاجانا مطر والا لاجانا ضيوف

هويّتنا فعايلنا ونعطي البل ونعطي الراي

ورثنا شمس عزٍ بإذن ربي ما يجيها كسوف

وذممنا ما تجي في ساحة البياع والشراي

جوابي ما تغير يا زماني والصفوف وقوف

تبيني يوم ثقلت خطوة الأيام أعد خطاي

كسبت ولا خسرت وكل هقوه جهدها مخلوف

ما عاد أحرص على السجات والاقبال والاقفاي

أثمّن كلمة العاقل وأجنّب كلمة الملقوف

ولو إني بأصدق ما وصلني قد وصلت اقصاي

قنعت وراس مالي خوّة اللي منهجه معروف

أماري به على الاشهاد واحطه على يمناي

** **

- علي بن نايف الغامدي