الصوت

تفتحت بيبان قلبي بعد حول

كف العذل يا عاذلين معذولا

يا صاح كثر العذل واللوم مملول

ما يسمع المغرم نصايح جهولا

وكلٍ على طبعه من الناس مجبول

والفرق واضح بين ذولا وذولا

أنا شريد الفكر والحال منحول

سليم جسمٍ في ثياب معلولا

دايم زعول ومني الفكر مذهول

ارا الجلد وحصون صبري صمولا

يا صاح أخذ مني عن الحال مدلول

شيءٍ لجا في ضيق جولي يجولا

راحات قلبي ما تجي لي على النول

حتى ولا من طيف خلّي رسولا

راعي جديلٍ فوق الأمتان مجدول

دلال شيخٍ فوق ورك الذلولا

العام جرحي من هوى البال مكتول

واليوم عيني تفضحه بمهلولا

ما اشوف غير مجمل الحفل مجمول

في خاطري عن كل حيٍ يحولا

ليا ضحك باللّي كما صافي اللول

بين الشفايا والكلام معسولا

تخالهن وادٍ من الوسم مسيول

ريضان قلبي عقب ماهي محولا

ولو ناشني من فيض حسناه هملول

يخضر قلبٍ من فواده جفولا

عزاه يا محمد عن الوصل مشكول

لاهنت شف لي يالمجرّب حلولا

يا بوخلف شف لي من الرأي مفتول

قدام لا يقف القمر بالأفولا

إن ما تهيت من منك الأفراج بحلول

عقب النهر ما ينورد للدحولا

- عبدالله بن نايف بن عون

* * *

الصدى

البارحه جفني جفا يا بن هدمول

لذ الكرى وش حيلتك وش تقولا

ليا قلت وش رأيك ترا ما بها زعول

الراي دايم به صعود ونزولا

ليا صار فكري يم إبن عون مشغول

هاك القبال اللي عسى ما يزولا

أنا آصله من فوق من تقطع الكول

والا اتصل به هاتفيٍ عجولا

حيث إن ابو نايف له الحق مدبول

فيما ملكت وما يديني تنولا

راع الجواب اللي من الفكر معدول

ما فيه ما ينقال لولا ولولا

كنه من الواحد وعشرين مولول

بيدين فنيٍ يسوي شكولا

يا صيرف الجوهر تغزلك مقبول

جعلك لمطلوبك من الله تنولا

شعاك طفلٍ غض مجمول مدلول

اللي بنغماته غنوجٍ خجولا

عجّاب لعّابٍ بالأوصاف مكمول

مرٍ معك راضي ومرٍ زعولا

مثله يخلي طيّب الفكر بهلول

من فقد عجّاب المزوح الدحولا

قبلك سمّيك قال يا آحول يا آحول

خذن قلبه زاهيات الحجولا

ما فيه قلبٍ عن هوى البيض معزول

يا بن الرجال الطيبين الفحولا

اللَّي لهم في نجد تاريخ وفعول

يوم القبايل تفتخر بالفعولا

إن كان قلبك من عراويه منتول

ياما وياما شال قلبك حمولا

احمول حب اللي غذاهن من الشول

بيض العواتق عايزات الدلولا

اللي ليا مرن وانا القاع ماهول

غضن وفي عيونهن تقل حولا

وانا تراي مبيدن هجن ونعول

مع دربهن يوم اسطفاق النزولا

هذا الصحيح وبيننا الشك مزيول

ياللي فوادك للموده ميولا

ان كان خلّك واقفٍ دونه شمول

شمولٍ تقول ابعد وحنّا به أولا

محجّرين ودونه السيف مسلول

والعين دون مغيزل العين شولا

وانته على حسن النبا ضايق الجول

والباب دونه مغلقٍ بالقفولا

عليك باللي من زبنهم مشا طول

حكّام نجد مطوعين العيولا

إن كان قاموا فيك صاحبك مكفول

ما والله أذكر غير هذا حلولا

ماهوب وقت مصافق خيول بخيول

اليوم حكّامٍ وحكمٍ عدولا

- محمد بن خلف الخس (رحمه الله)