الأرض شرحه والفضاء أكثر رحابه

لا ضاقت صدور المجالس من الغي

سج القدم وافتح زرار المهابه

وان اعترض لك رأي ما جاز لك عي

بعض الوجيه تشوف فيها كآبه

لو يضحكون صدورهم تشتعل ضي

ولو كل من رام أطيب الكسب جابه

ما كان خلّد بالكرم حاتم الطي

كم من سؤالٍ ما لقينا جوابه

وكم مجلسٍ مهجور لو صاحبه حي

الفعل يفرق لو الأسماء تشابه

مثل ما يفرق لاهب الشمس والفي

واللي على الغرّات يشعب ركابه

لو زاد به سيل الطغى عوّد شوي

واللّي عليك يزوم ويحد نابه

عليه سن الموس وأجود له الكي

ومن لا يحشمك لا تحشّم جنابه

ومن لا يشوفك شي لا تحسبه شي

إرمه لقطعان الخلا والذيابه

إن صِيد يُوكل ني وان صاد أكل ني

** **

- نايف المطيري