ياللي لبست المدايح مثل لبس الهدوم

مستعربين العرب جاهم عرب عاربة

لو تكسب النعم يلحق من بعدها ثلوم

المرجلة في البشر ماهيب متقاربة

بشويش والمسألة ما هي سوالف ونوم

العلم يبغى يميناً في الوغى ضاربة

ما هو مزارق رخا والا مطامر رخوم

وان صاح راعي طلب كلٍ عطا الخاربة

المدح يستاهله قرمٍ يسد اللزوم

حرٍ ليا قيل له تكفى فتل شاربه

يفداه ذيب المجالس مستهيض العلوم

اللي ليا مره اللازم لوى غاربه

والنَّاس ما بين ذا معطى وذاك محروم

والطيب وهبه وفزّات السعة صاربة

تضيق الأقطار في نظرة ردي العزوم

والنادر يهوّن الصعبة على أقاربه

رجلٍ ليا طالت الطرقة عليها جزوم

الكايد يشوش له والهين يكاربه

مقدام ربعه ليا كبرت وقامت تزوم

نوايب الوقت والهقوات متضاربه

ورجلٍ من الوهن فعظامه ما يقدر يقوم

يضيق فيه الفضا من ضيق مشاربه

والناس تعرف مواردها بحسب السلوم

وليا وردت ضامية ما صدّرت شاربة

واللي لبس مع جديد الوقت مرس الهدوم

قولوا له ان العرب معاد هي عاربة

** **

- نايف المطيري