الموضوعات الأكثر
للشاعر محمد البلاهدي صديق كلما جالسه طلب منه أن يسمع منه قائلاً: ولو بيتين من الشعر.. وقد كان طلبه المتكرر شرارة هذا النص:
يا بن سعد نعطيك بيتين بيتين
صاحبك يا فيصل تمعن كلامه
ابشر يا بن شالح على طول ذا الحين
من الشعر نعطيك ذروة سنامه
ركز معي يا مثمن الشعر تثمين
واحفظ مضامينه يا مال السلامة
ثنتين تتجمع بزين على زين
مجلس هل التقوى.. ودعوة كرامة
المجلس اللي يجلسونه هل الدين
يريح المؤمن ويرفع مقامه
من لا ركز فوق المفطح بسكين
لا خير في شربه ولا في طعامه
ثنتين تتجمع بشينٍ على شين
لا اجتمعت الثنتين.. كبر ورخامة
الكبر طبعٍ من طبوع الشياطين
للفسق والعصيان مثل العلامة
والصقر تعرف هيبته بالجناجين
والا الحمامة لو تهيش حمامة
ثنتين ما يصلح تجمع بثنتين
مال وبخل.. والبندقة والهلامة
طبع البخيل اللي يلم الملاييين
يصبح نظام الناس ما هو نظامه
وأهل البنادق لا تقافوا مهانين
وش فايدة نظم الرصاص وحزامه
وثنتين جامعها تحمّل بها الدين
اليا اجتمع فوق الشجاعة غشامة
من لا ضبط نفسه بحرب المعادين
سوى السواة اللي بعدها ندامة
ومن لا يوزن للأمور الموازين
تحفر له الأيام تسعين قامة
وثنتين تدخل بك قلوب السلاطين
بذل العطاء لله.. والابتسامة
لا يمكن الاحسان يصلح بوجهين
شتان بين الكذب والاستقامة
ومن عاش بين الناس بالصدق واللين
كلٍ عطى له هيبته و احترامه
وثنتين تلعب في علاقات الادنين
حسدٍ على النعمة.. وكثر الملامة
والله ليفنى ما لقى له مداوين
من يحسده خاله وأبوه وعمامه
كثر العتب لا طال بين الموالين
كلٍ مع الثاني يقل اهتمامه
وثنتين تنقص من مقام النزيهين
طرد المقفي.. واختصام الرمامة
من راح مقفي مع جموع المقفين
اشره على اللي ينشدونه علامه
لا تخاصم الرمة سليل المرمين
مقابله نقصان حتى بخصامه
تمت وتلقى بالتجارب براهين
والشعر يطرب يوم يبلغ تمامه
** **
- محمد البلاهدي