اذكر الله طول وقتك وصدرك لا يضيق

خل عندك في حياتك ومنطوقك ثقة

لا تعثر وانت توك على نصف الطريق

واصل المشوار واللي على الدرب افرقه

الله اللي واهبك عقل.. يالحر الطليق

تفتح الباب المشرف والاخر تغلقه

لا تحمّل في حياة العنا مالا تطيق

ما معك قدرة على مستحيلٍ تخلقه

ساير الدنيا بحكمة وتفكيرٍ عميق

واترك اللي بالخلايق لسانه يطلقه

احفظ اخلاقك وخلك على العهد الوثيق

وكل مخلوقٍ محاسب على ما ينطقه

لا تدقق في كلامٍ مجاله ما يليق

التغاضي منك عن تايه الراي.. صدقة

كان عنده عقل يمكن من اوهامه يفيق

وان تمادى بالخطا بحر الاوهام اغرقه

أحمد سعود الحمد - الزلفي