الموضوعات الأكثر
هب القصيد وعاد لي عقب ماغاب
وساق الحيا بعروق قلبي دبيبه
وتسابقن من عاطر الخاطر اعذاب
غر المعاني واقبلن عقب غيبة
حب وولا من خافقٍ حي واعجاب
للعاهل اللي ماذكر مثل طيبه
عاهل عظيم وللوطن درع وحجاب
خادم بيوت الله مكة وطيبة
سقم العدا لاحل بالجو ضبضاب
سيفه شطير ولا يداوى صويبه
الى سطى يخافه اللي بالاصلاب
ومن واجهه يبشر بنارٍ تذيبه
سلمٍ لمن سالم وطيبٍ لمن طاب
ويبشر بعزه من نهض ينتخي به
ابو فهد حبه تمكن بالالباب
وله مستقرٍ بالصدور الرحيبة
مثل الهوا حبه بالاجساد ينساب
لاحل بنفوس الملا تهتني به
طيبه طبع.. غيثٍ على الدار سكاب
ولشعبه بقلبه فياضٍ عشيبة
طول العمر قصره تقل ماله ابواب
والنفس سمحة والسجايا عجيبة
يبذل بلا منّة ولاحد وحساب
الله على جوده وفعله يثيبه
حكمه عدل والحق ماعنه مجناب
ولاهوب يرضى للضعيف الغليبة
عم الوطن خيره ومن جاه منصاب
من خارج حدود الوطن خذ نصيبه
للمسلمين وللعرب بيت واطناب
عونٍ لهم وقت الرخا والمصيبة
ربيع حكمه عم وديان وشعاب
وامتد واثمر بالقلوب الخصيبة
له بيعةٍ من كل شعبه بالارقاب
بيعة غلا ماهيب بيعة غصيبة
حنا وهو في قربنا.. عين واهداب
واعظم من شعور القريب لقريبه
ولاجله قصيدي عاد لي عقب ماغاب
وساق الحيا بعروق قلبي دبيبه
- شعر: علي بن عبد الله المفضي