الموضوعات الأكثر
لاحت بروق الوسم واستبشر الدار
واستملست منه القلايد مباكير
نوٍّ همى ودقه على الخد مدرار
ودار الفلك وجهه لنقالة الطير
وراع الولع فكره مع الطير يندار
والشوق شره مع الحرار المغاتير
هذالك الاشقر خص به راهي الاشبار
اللي بوصفه من محمد تعابير
عديمٍ افضل ما تسميه بتار
وباسمّعك وصفه بادق التفاسير
جوهر ولع ريشه تماوج لهب نار
تبري ويغري فيه بالشعر تصوير
وجهه الى شلت الغبا عنه تحتار
فأوصافي أبينها لفعله تباشير
هو سلوتي لاطال في القنص الاسفار
فرخ وحش يعطيك للظن تبرير
كنه يقول اجزم وراك انت محتار
مشهور هو طير الرجال المشاهير
ياخوي يا محمد نبي دار من دار
وانت المخيّر في جميع التقارير
نبى المضحى والمعشى فالأقفار
لا استفصلن معنا الفروخ السواعير
في روضٍ اخضر كن خربه الى طار
طيارةٍ تعطي للاقلاع تحضير
وحر الحرار اللي يقودك للاقفار
كنه يقول اطلق لي السير اباطير
على الخريش اللي الى بنت له طار
خرب فقع قبل الدجاج المعاشير
في خايع متشابكٍ فيه نوار
زهر الربيع وجول اقفى مدابير
صفق الحباري درج فالقاع وطيار
بشقر الحرار ورفقة اعلا المناعير
وشوق الولع يلعب بقلبي ولى كار
قفز الحواجز في القنص والمحاذير
تبعت شف الطير في كل الاقطار
وانت المميز من ورا كل تنظير
- الأمير عبدالعزيز بن سعود بن محمد