الموضوعات الأكثر
قصيدة ورد بين الشاعر عبد الله الطلحي والشاعر سعود بن ناير الشاطري المطيري يقول الطلحي:
ياسعود انا هم قلبي عارفٍ طبّه
عرف علاج الهموم وطب الأجراحي
الليلة الباردة والبر والشبّه
مع ريحة الهيل بالدله ليا فاحي
واخوان مثلك جذبهم طاري النبّه
حضروا وجات السوالف جد ومزاحي
سوالفٍ ما بها غيبة ولا سبّه
وشعرٍ يداوي المعنى لين يرتاحي
شعرٍ نعزه وسوق الرخص ماطبّه
ما نجلبه ساحة المجنون والصاحي
صافي الذهب نصهره ويذوب ونصبّه
صب الجنيهات منقيات وصحاحي
مخزونةٍ دونها المفتاح والضبّه
في الخزنة اللي لها ضبه ومفتاحي
نخفي رموزه عن اللي ما عرف لبّه
ونوثقه من عبث سارق ومزاحي
هذا هو اللي يبومروان نطرب به
يسوى الملايين عند أصحاب الأرباحي
وإن فاتنا الاجتماع وقاف نلعب به
داويت همي بدربيلي وبسلاحي
بأرضٍ تضاريسها الضلعان والخبّه
أسري واخلي مباتي عند مسراحي
في موقعٍ من قديم نجيه ونحبّه
فيه الجوازي لها مدهال ومراحي
مع شقة النور ولياها على تبّه
يوم استعادت ووقفت مثل الأشباحي
واللي تساوى على النيشان والحبّة
حزناه عنها بعد فيه السهم لاحي
رمية عطب جات بين العنق واللبّه
حاول يبا المستحيل وفز ثم طاحي
والطيب من غرشة العطار منكبّه
يفوح من مضرب البلجيك نضاحي
عز الله إنه يداوي القلب ويربّه
رب الدلال القديمه وقت الاصلاحي
وإن ما تهيا علاج القلب من ربّه
يا سعود ما ينفعه عاذل ونصاحي
وهذا رد الشاعر سعود بن ناير الشاطري المطيري:
من عقب ما قلت طرق الشعر ابا أكبّه
كلٍ عطاه النحر سايب ومصلاحي
كلٍ معه شون يهوي به ويضرب به
ويحث عرجه على الميدان طفاحي
في باله إنه يبا يذن على القبة
نهار بكره وشوف الشمس ما إنباحي
لابس على المشلح الشيرازي الجبة
وينوح مع نايح القمري ليا ناحي
قدح فتيل الولع عبدالله وشبه
وجلّسه جلسة عرب عند بن شلاحي
القلب ذودٍ ثنى ربعه على غبة
وصوت الرعد له على سمعه تنحناحي
حرٍ نداوي ليامن الولع هبه
ما عاد يثنيه عن مشهاه ملواحي
كفه حبايل غزايز والعمر شبه
لو إني ابرقعه ما ذاق الأمراحي
والشعر عبدالله الطلحي تشرب به
وأنا اتلاعب بشرده مثل مسباحي
في كور نمرا ليا قامت تكرّب به
لو هاج موج الشعر عايم وسباحي
يرخي رسنها رها ويعوم في الغبة
ما هو عن العوم متشبث بالألواحي
شف كيف صفف جواهرها على ابّه
الصدر, والعجز مبنيٍ على آحي
صب الذهب يا وسيع المعرفة صبه
حرٍ معك حر له مخلاب وجناحي
هرج العقل من حكيم الراي ننصب به
ونعدها تاج من شرواه ووشاحي
راعي ولع ما يجيب الهرج من عبه
يخالط الصيد مع فلاج الأصباحي
ويا زين قرع الخشيبة قبل يندب به
في مترسٍ لك على رجمه تلحلاحي
يا حكمة الصمت عبدالله هو السبة
يصر عينه ويرميها على الشاحي
- عبد الله الطلحي