توكل على الله ودعس الكايد الصعب

ونهض جناح العز وادمي بمخلاب

وفزع لمن ينخاك يا سيد العرب

في ليلتن تبهر بصر فرس وعراب

لا طق عودن عود والكون اضطرب

يرسي طويق وساكن اطويق ما خاب

هاذي جنودك يطيب العرق والنسب

يصولون لا شاشوا وتجذبهم انساب

اللاش تلهيه المعازيف والطرب

والحر ما يضوي سوى راس مرقاب

تعجبك سطوتهم ولله العجب

في الليلة السودا يزيدونك اعجاب

الله ما أعظمك يا جهاد الطلب

في الأرض رجليه وفي الجو اسراب

نقدم عليهم مثل ما يقدم الصهب

للشر باب الشر والخير له باب

نعرف عدو الدين يبعد ويقترب

والموت واحد لو تعددت الأسباب

برضاه لان ون ما لان يلين بالغصب

جيشك وشعبك في المحن هادي أعصاب

انا سعودي رافع الراس والسبب

فخورن رحومن عابدن رب الارباب

في عنقي البيعة وفي قوسي النشب

وسيفي سطا بعناق من يفتل اشناب

حليمن الا سالم شديدن الا غضب

أهلي بضيفي ثم للنار شباب

وقولوا لمن كثر من القول والعتب

من يدعس الجمرة ما يسمع اعتاب

ان ما طلبت الاجرب، الذود ينجرب

وان ما قطعت الروس، ما ماتت اذناب

وان لطمت العايل اشغلك بالشغب

صغير الغصن لا من كبر صار مشعاب

وعن ديرتي باذود بالروح والذهب

في حاضر الخوبة وفي ماضي اجراب

الأمير فيصل بن جلوي آل سعود - الرياض