نحاول تجي الدنيا على ما نبي ونريد

ولكن يحيير من يفكّر تقلبها

أركّز على بعض المواضيع بالتحديد

ولكن عوجاء دوم مهما نقلّبها

ألا يا زمانٍ فات ما فيه أمل تعيد

لعل الطبايع الاوله منك نكسبها

اشوف البشر تزعل ولو ما حصل جديد

ايلا زعل من وقته معانا يخرّبها

ولو فز لحظاتٍ رجع ما يروح بعيد

هذا اللّي حصل والناس مانيب اراقبها

وبعضهم يبي هرج القفى يردده ترديد

وبعض المجالس ودك إنّك تجنبها

مجالس مدارس فأول الوقت منها تفيد

وفي وقتنا دوم العراقيب تشذبها

ولو في حياته يذكر الوعد والوعيد

ما يفتّش بخلق الله يدوّر معايبها

يدوّر خفايا الناس ويعدّها ويشيد

ولعيوبه ولو شافت عيونه يكذبها

ومن قنع في رأيه له النصح ما يفيد

على عكس ما تقول فكره يحسّبها

تبعّد عن دياره وخلّه يروح بعيد

وحب الطريق اللي دياره يجنبها

غنام مسعود القريني - نعام