والله.. لو تملك.. مثل مال: «قارون»

وعندك مثل ما عند: قيصر، وكسرى

ان صرت ماتصلي مع اللي يصلون

لو تغتني بدنياك.. تاليك: خُسرى

وان ماعطيت اللي من الضيق مديون

وان ماجبرت اللي.. من العاز كسرا

هذا العمر يمضي ولاهو بـ مضمون

والعيش به: عسرٍ.. ويتليه يسرا

خلّك من اصحاب الميامن، ولاتهون

وش الحياه ان كنت من: قوم يسرى

من يشري الدنيا لمشهاه.. مجنون

ما يلحقه ياغير.. همٍ، وحسرا

يا صاحبي.. والعمر: داين ومديون

لا ينثـني عمرك: بالأحلام.. قسرا

في دنيتك.. خلك مثل ما يقولون

عابر سبيل.. وخل الاهواء: أسرى

خلك على العليا، ولا تكون.. بالدون

وخل النوايا البيض: لليل.. مسرى

مشيت في دنياي، والحلم.. مرهون

مشي السفن.. من فوق ألواح دُسرا

يقولها اللي: من عنا الوقت مشحون

وأخذ من همومه.. للأفراج: جسرا

- سالم مقبول الشراري