قصيدة رثاء كتبها عضو مجلس الشورى الأستاذ الدكتور عبدالله بن سالم المعطاني في أخيه وصديقه اللواء ركن طيار/ محمد بن سالم المعطاني، رحمه الله بواسع رحمته.

مرحوم ياشيخ الرجاجيل مرحوم

يالقائد الكايد رفيع المقامي

أنا أشهد إنك في ذرى العز مرسوم

أسمك علا من فوق كل الأسامي

تبكي عليك أم الجناحين فى الحوم

وتبكي عليك البدله أم الوسامي

ويبكي عليك السرب ياسيد القوم

يا صقر ياللي بالجناحين حامي

ويبكي عليك الجود والطيب مقسوم

ياعد يامروي ظما كل ظامي

الطيب ما يشرى بشيكات وهدوم

والصقر ما هو مثل ربد النعامي

نظيف ثوبٍ ما تدنس به اللوم

حب الوطن بين اللحم والعظامي

عن الدنايا رافع النفس ويشوم

ياكثر ما شفته عن العيب شامي

يابومشاري ياسعد عين مضيوم

وكل من ينصاك نال المرامي

القلب من عقبك مجرّح ومكلوم

وما طاب للجفن المعنّى منامي

أبكي عزيز الناس مانيب مليوم

واللي بكى مثله ترى ما يلامي

يالله يالّلي تقبل الحج والصوم

تقبل دعا قلبٍ من الحزن دامي

ترحم فقيدٍ بعده الحال مهموم

وتمطر على قبره سحايب هوامي

أ. د. عبدالله بن سالم المعطاني - عضو مجلس الشورى