الموضوعات الأكثر
مجاراة للشاعر سليمان بن عبدالعزير السنيدي في مرثيته في الشيخ عبدالعزيز بن عبدالله السنيدي رحمه الله رحمة واسعه وأسكنه فسيح جناته
سليمان جبت الشعر لاحزاني السود
والذكريات الماضيات الحنونه
ذكرتني شيخٍ على كفّه الزود
شيخٍ جبال طويق كنّه متونه
اللي على فعله مخاليقه شهود
(والعب) تشهد له وتبكي مغبونه
مامر يوم وقالوا الباب مردود
ناسن تجيه وناسن يودعونه
لضيوف ربعه واقفن كنّه الطود
ولو هي بكيفه كان قلّط عيونه
يفوح طيبه طيب من مكسر العود
وما هي غريبه لابته ينتخونه
أكرم من الهتان وألطف من النود
ديمٍ من الوسمي تلاعج مزونه
ما له عوض لو قالوا الناس مفقود
وما له شبه لو حاولوا يشبهونه
شف الحريق كبدها حيل ملهود
وقلوب أهلها بالفراق محزونه
سليمان تبغى الصدق يامنبع الجود
بيتن اباقوله وتفخر وزونه
ابوك رمز وله مواثيق وعهود
وبقلوبنا حبه عهد مانخونه
وان قلت عميّ افتخر واصعد سنود
وعلى الوفاء الاول نعيش ونصونه
وعساه بالفردوس مع النبي هود
ادعوا معي ما دامكم تذكرونه
- محمد بن عبدالعزيز الحسن