ما للعتب منك أنت يمي معابر
ومالك معي حلف ويمين وملازيم
كف العتب ما كل ما مر عابر
بعض الكلام يحطم الصدر تحطيم
والله ما اقبل لو تضج المنابر
بالزيف يوم الزيف للصدق تحجيم
أنا على خبرك مثل ما انت خابر
أرفض شعور اللوم والظلم والضيم
لاصرت لا مخطي ولاني مكابر
ولا اهفيت حق ولا جهلت المفاهيم
لكن بلايه وجه الأيام غابر
والمقبلات من الأماني معاتيم
شفني قضى عمري على المر صابر
ما لاح برق ولا لمح ناظري غيم
اشوف رحبات المنازل مقابر
وبيض النوايا في عيونك مجاهيم
ما كل كسر له مع الوقت جابر
بعض الكسور تصير عاهات وتديم
فرق المناظر عن جميل المخابر
مثل الثرى الممطور عن فاقد الديم
لا بارك الله بالشعر يالمحابر
إن ما عزف لاوجاع غيري تقاسيم
وشد انتباه الاغنياء والاكابر
قبل الفقير أبو اليتاما المظاليم
كف العتب ما كل ما مر عابر
بعض الكلام يحطم الصدر تحطيم
عاقل الزيد - رحمه الله