بديت يذكر خلاّق العباد اللي لهم يرحم
عظيم الشان علاّم السراير مجري الأنسامي
يحفظ اللي غلاها وسط خفاقٍ بها مهتم
لها بالفرقدين أعلى مقام ومنزلٍ سامي
أنا بحماك ياللي تستجيب لدعوة المسلم
تنجيها من اللي صابها وتحقق أحلامي
ترى لو تطلب الروح العزيزة قلت يمّه تم
أعلقّها على صدر الحبيبة تاجٍ وسامي
ألا يا الله تشفي سقمها وتزيل عنها الهم
بجاهك يالحكيم اللي تعالج كل الأسقامي
عسى ما صابها تكفير ومن آلامها تسلم
تطيب من المرض وتقوم تمشي فوق الأقدامي
إلى ناديت يمّه ما تجاوبني وتتكلم
كأن الكبد وسط الجوف فيها مخطرِ حامي
عليها الدمع عيني تزعجه من فوق خدي دم
وراقب للنجوم السارية بالليل ما نامي
أناجي في دجى الليل البهيم لواحدٍ يعلم
إله الكون حيثه للخفا والغيب علاَّمي
دخيلك يا مجيب المستغيث اللي جذبه اليم
تروف بحالها بالمقتدر من كل الأوهامي
أنا صابر على ما قدّر المولى وما يقسم
ولو جارت صواديف الزمان وغدر الأيامي
- محمد فهد الجربوع العنزي