يا جذع الهوى مالت غصونك عليّ وملت
وانا من ضحايا العين والخد والغرّه
إليّ كم سنه باكتب غزل مير ما حصّلت
نوادر قصيدٍ تعجبك غير هالمرّه
على رجم حبك من تعلّيت ما حوّلت
ولا فيه غيرك فوق رجمي لها جرّه
سما بك خفوقي لين عدّا النجوم وطلت
مدار القمر واخذت بك فيه كم فرّه
لو أنك تشيل من المشاعر كثر ما شلت
وقف حزن أهل غزه على محمد الدّره
اعدّيك وابدّيك يا هاجسٍ لا زلت
تساما من العارض ليا قاصي الحرّه
عن العشق مهما قالوا الناس والا قلت
عيون القلم عقب أسود الحبر محمرّه
بعد ما ذبحني برد هاك الغرام اشعلت
غضا شعري اللي يشكي البرد من حرّه
وانا خابرن قلبي لو أني عليه احتلت
من الشوق حتى سلك معطفك يجترّه
لو انك سحابه عابره كان ما خيّلت
روتك العيون وجاتك أرواح مسترّه
- سلمان عزيز الحافي