الموضوعات الأكثر
من قال فيك من المحلل خصايل
صدق ومنها في حجاجك دلائل
دلائل يرويبها كل عاقل
وأهل العقول يميزون الخصايل
والا ضعيف الرأي من غير يمّه
لا هوب لا قاصر ولا هوب طايل
منها ثلاثٍ ما عليها تفاهم
ماكنها الا نور شمس القوايل
في قومتك في نظرتك في التفاتك
يشوش منها اللي براسه صمايل
قومتك فيها الحزم والحزم قايم
العاصفة ردّت كبودٍ غلايل
ونظرتك فيها للمداهن شراسه
كنها تقول اركد وخل العذايل
ولفتتك لإخوانك وللشعب كله
شعبٍ وفيٍ من عيال الحمايل
ما هوب شعبٍ فيه هنّه ولنّه
حنّا العرب حنّا أصول القبايل
حنّا رجاجيلك وحنّا سلاحك
لاجا نهارٍ فيه قدح الفتايل
نارد على الموت الحمر ما نهابه
اما لنا والا على قول قايل
جدك يقول انهض بها لاتدراء
العمر مثل الفيء ساعه وزايل
وحنا آليا قلنا كلامٍ وفينا
ولنا مع صقر الجزيره فعايل
قمنا معه من طيب راْسه وساسه
سليل مجدٍ من عصور الاوايل
اصطى من الصاطي على كل صاطي
واليا اعتلى قب المهار الأصايل
تشوف من ضرب المهند عجايب
في ساعةٍ فيها تشوف الهوايل
روسٍ تولاها وروس تهابه
وروس نوت فالليل شد الرحايل
وروس عطته وجيها واقبلت له
وعطت عهودٍ ماوراها بدايل
وعهودنا برقابنا ما تبدّل
ما دام فوق الأرض عينٍ تخايل
من سطوته من هيبته من مقامه
من كبر حظه في جميع الوسايل
حظٍ على فعلٍ ونصر من الله
ومن قام حظه ذب روس المثايل
ليثٍ صمد ومع الصمود اتكاله
على جليل الملك جزل الفضايل
وحّد وحد شملها واستوت له
وقامت تجيه من الفرنج الرسايل
عساه في الجنة تخلّد عظامه
أمين يا محيي الديار المحايل
وسلام يا ذخر العروبة سندها
لا شبهر البوّار شين الدغايل
ترفع لهم يمناك وتقول عندي
ولا قلت عندي برمجت كل سايل
ما عاد يدري وش كلام يقوله
راحت على أهل الغي وأهل الحبايل
راحت على الحوثي وراحت بغيره
لا عاد له حيله ولا هوب نايل
الله ردع كيده ورده بغيظه
وخابت طموحاته وراحت دبايل
ويدوم عزّك يا سندنا ذرانا
يابن الملوك مطوّعت كل عايل
خدمتك للبيتين فيها كرامه
خدمة شرف فيها جميع النفايل
وما دام رأسك حي والعز قايم
حنا بخير ونعتلي كل طايل
وإخوانك آل سعود روسٍ رواسي
الاد مقرن كاسبين الجمايل
منهم ولي العهد ساعدك الأيمن
محمد ولد نايف زبون الثقايل
احلا من الذوب المصفى علينا
وسمٍ على كبد الضديد المحايل
ومنهم ولي ولي العهد شبل معنز
عينه على العليا لكسب الجزايل
من رأس أبوه ورأس جده وخاله
من روس روس ما عليها دخايل
الله يديم العز والعز نعمه
عطى من الرحمن جزل الفضايل
ومدام رأسك حي والعز قايم
حنا بخير ونعتلي كل طايل
- الشاعر/ هادي بن حفيش القحطاني