الموضوعات الأكثر
خبّر الحوثي ترانا واصلينه
لو زبن طهران والريس نجاتي
والله إنّا بالسلاح محاصرينه
عاصفتنا عاصفة حزم وثباتي
قادنا سلمان قبطان السفينه
المليك اللِّي فعوله نادراتي
كلّنا على الكتاب معاهدينه
ومع أبوه ألنا عهودن ماضياتي
شعبنا سيفٍ مجرّب في يمينه
ينصر الإسلام ويصد العداتي
نحتزم من دون مكه والمدينه
ما نهاب الموت ونعاف الحياتي
جعل رجلٍ ما يدافع دون دينه
تأخذه سود الليال المقبلاتي
الدفاع عن الوطن يا منكرينه
فارضه ربي مثل فرض الصلاتي
جيشنا الحد الجنوبي محتمينه
دونه اللِّي ما يهابون المماتي
يا وطنَّا دونك احصونن حصينه
عسكري ومدرعه مع طائراتي
والله إنّا للسلام مناصرينه
بس لا دقّت طبول الحرب ناتي
فعلنا معروف وانتم خابرينه
يوم ضرب السيف فوق الصافناتي
من يحاربنا تشوف الويل عينه
انشد التاريخ واقلام الرواتي
لا دعتنا الحرب قلنا الموت وينه
في سبيل الله نسوق الغالياتي
مخلصين لربنا وموحدينه
ربنا المعبود محمود الصفاتي
جيشنا يالله على الظالم تعينه
وانصره واجعل عدانا للشتاتي
- الشاعر/ سهل بندر بن حياد المقاطي