ما يضحك الجاهل إلا من كثر جهله

لا زاد همك ترى ما للحكي داعي

غنى صبي القصيد وجاوبه كهله

والوقت يعصى شهر وسنين ينطاعي

لقيت قصر المديح ولا لقيت أهله

من جاك ينشد ترى ما هو بفزاعي

لو قال يمدي ترى ما للقدر مهلة

لا الحظ يشرى ولا الأعمار تنباعي

ما هو بانا اللي يعود حين ينده له

أصعب من اقفياتي لا اقفيت مرجاعي

يحق له يفرق اللحظة عن الوهلة

دايم ولكن خطا لو يمدح أوضاعي

ويحق له لو يعاتبني على مهله

دايم ولكن خطا لو يلوي ذراعي

يا صاحبي والله أن المسألة سهلة

كل واحد شيخ صعب تحصل الراعي

ما يبكي العاقل إلا من قصر جهله

لا زاد همك ترى ما للحكي داعي

- هلال المطيري