اِرْحل عداك الُّلوم واشْهر وغادرْ

مالكْ مكان إلّا على عرش الاذكار

اِرْحلْ رحيل أبوك للمجد ثايرْ

مكانك التّاريخ يابَرّ الابْرارْ

اِرْحلْ على هامات الأيام طايرْ

في موكب الأَفْلاك بالعز سيّارْ

اِرْحلْ وللعدوان كسْر الخواطِرْ

شافوا الوطن سجّل لك المجْد تذْكارْ

وداع ياباقي الرّجالْ النّوادرْ

الّلي لهم بالنّايبه موقف وْكارْ

وداع ياصوتٍ يهزّ المنابرْ

نجم السّياسة والمحافلْ والاخْبارْ

وداع يا الّلي كل ما حارْ حايِرْ

تلفّتتْ يمّهْ مطاليب الاشْوارْ

وداع يا الّلي عانقتْه الضّمايرْ

حبّوه خلق الله كبيرين وصْغارْ

خلّدْت اسمكْ ما رضيت الصّغايرْ

وتركت عابرها لشهْوات الاصْفارْ

ثروة حياتكْ جمعتها الحناجرْ

حبٍّ وتقْديرٍ وتعظيم وكْبارْ

ناسٍ مظاهِرْ شيّ وناسٍ مخابرْ

والشّاهد الله انّك خْيار الاخْيارْ

شمسك غشاها اليوم دونكْ غبايرْ

خلّيتنا يا سعود والوقت غبّارْ

يا عين اخوك الّلي تردّ العبايرْ

حَبسْتها والدّمع للعين غدّارْ

يقولها الّلي بالمواجيع خابرْ

رَجْلٍ على صكّات الايام صبّارْ

- شعر/ خالد الفيصل